«Yaltalı Hizb ut-Tahrir işi» figurantı olğan Vadim Siruknı Rusiyeniñ Krasnodar ülkesinde OMON hadimleri köteklegen – qol ve ayaqlarına urğanlar, dep yaza yanvarniñ 5-nde Facebookta qırımlı advokat Emil Kurbedinov.
Onıñ sözlerine köre, söz bir afta evelsi olıp keçken vaqia aqqında kete. O zaman Krasnodar SİZOsında Siruk üzerinden qılınğanları aqqında malümat aşikâr olğan edi, lâkin o zaman bu faktlar aqqında iç bir şey belli degil edi.
«Yaltalı Hizb ut-Tahrir işi» boyunca apiske alınğanVadim Siruknı 2017 senesi dekabrniñ 29-nda, onıñ üzerinden qılınğanları aqqındaki haber peyda olğan soñ, İctimaiy közetüv komissiyasınıñ (İKK) azaları ziyaret etken ediler. «O (Siruk – QA), alı fena degil, bedeni zarar körmegen, sağlığı da yahşı. Vadim ne içündir etap boyunca yollanmaqtan çıqarılğan ve ağızlıq kiysetilgen köpeklernen beraber kütleviy tintüv keçirüv kibi hususiy «planlı» tedbir ötkerilgen. «Qaba davranğan» bir qaravulnen ekisi arasında bir dava çıqqan. Vadimniñ elektrikli tıraş maşnasınen namazlığını çekip alğanlar. Meger yasaq eken, keççe qaytaracaq ekenler emiş. Şimdilik olğan malümat budır», – dep yazğan o zaman Facebook saifesinde rusiyeli advokat Aleksandr Popkov.
2017 senesi dekabrniñ 4-nde Aqmescitte, Rostov okrugınıñ arbiy mahkemesi «Yaltalı Hizb ut-Tahrir işiniñ» figurantları Muslim Aliyev, Emir-Usein Kuku, Vadim Siruk, Enver Bekirov, Refat Alimov ve Arsen Cepparovnıñ tevqif müddetini 2018 senesi mayısnıñ 27-ne qadar uzatqan edi.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı dep saya. Advokat Emil Kürbedinovnıñ qayd etkenine köre, Rusiye uquqqoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleridir.
«Hizb ut-Tahrir» halqara islâm siyasiy teşkilâtı bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek oğrunda terroristik usullarnı red ete ve Rusiyede adaletsizce taqip etilgenini aytalar. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etken edi.