Ukraina Tış işleri nazirligi (MİD) dekabrniñ 14-nden berli reanimatsiyada yatqan qırımtatar faali Bekir Degermencige acele tibbiy yardım kösterilmesini talap ete. Bu aqta dekabrniñ 15-nde Twitterde MİD spikeri Matyana Betsa yazdı.
«Bekir Degermenci. İşğalci tarafından qanunğa uymağan şekilde tutuldı. Alı pek ağır. Acele tibbiy yardım kösterilmesini talap etemiz. Rusiye Federatsiyasına narazılıq bildiremiz», – dep yaza Betsa.
Бекир Дегерменджі. Незаконно затриманий окупантом. У критичному стані. Вимагаємо надати невідкладну медичну допомогу. Висловлюємо протест РФ
— Mariana Betsa (@Mariana_Betsa) 15 декабря 2017 г.
Bunıñ arfesinde ukrain uquqqoruyıcıları AB, ABD ve Kanadadevleriniñ liderlerine muracaat eterek, Aqmescit SİZOsında bulunğan maalde bir kereden sağlığı fenalaşqan qırımtatar faali Bekir Degermenciniñ yanına mustaqil ekimleriñ kirmesine yardım etmelerini rica ettiler.
Bekir Degermenci dekabrniñ 14 gecesinden berli ağır alda reanimatsiya bölüginde bulunmaqta.
Noyabrniñ 23-nde kündüz Aqmescitte telükesizlik hadimleri bir gruppa qırımtatarlar – Kâzim Ametov, Asan Çapuh, Ruslan Trubaç ve Bekir Degermencini tutıp aldı. Olar Türkiye vatandaşından «aqsız yerde hususan büyük miqdarda para talap etüv»de qabaatlana. Rusiye telükesizlik hadimleri tarafından tutuluvları esnasında qırımtatar milliy areketiniñ veteranı Veciye Kaşka yaramağan edi. Daa soñra qadınnıñ vefat etkeni belli oldı.
Noyabrniñ 24-nde Rusiyeniñ nezaretindeki Aqmescitniñ Kiyev rayon mahkemesi tutulıp alınğan qırımtatar faallerini 2018 senesi yanvarniñ 15-ne qadar apiste qaldırğan edi.
Rusiye işğalinden soñ Qırımda mustaqil jurnalistler, cemaat ve qırımtatar milliy areketiniñ faalleri, qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.