İzolâtornıñ tıbbiy bölügi ile anda Çapuhnıñ yatqızılması aqqında añlaşqanını söylegen advokat Ayder Azamatov Qırım.Aqiqatqa, noyabrniñ 23-nde Aqmescitte «Veciye Kaşka işi» boyunca yaqalanğan qırımtatar faaliyetçisi Asan Çapuhnı muvaqqat izolâtornıñ (SİZO) tıbbiy bölügine avuştırmağa planlaştırğanlarını bildirdi.
Advokat: «Men SİZOnıñ müdiri vazifesini vaqtınca becergen kişinen bir qaç kere körüştim. O, imayem altında bulunğannıñ başta tıbbiy bölükke ve ondan soñ şeerdeki hastanelerden birine avuştırılmasına dair arizanıñ endi qolunda olğanını söyledi», – dep ikâye etti.
Azamatov, imayesi altında bulunğan Çapuhnıñ tıbbiy bölükke avuştırılğanından emin olmaq içün dekabrniñ 14-nde muvaqqat izolâtornı tekrar ziyaret etmege niyet ete.
Aqmescitteki muvaqqat izolâtorda apis etilgen 65 yaşlı qırımtatar faaliyetçisi Asan Çapuh mikroinsult keçirgeni içün hastahanede yatıp tedaviylenmek kerek.
Noyabrniñ 23-nde kündüz ilhaq etilgen Aqmescitte telükesizlik hadimleri bir grup qırımtatarlar – Kâzim Ametov, Asan Çapuh, Ruslan Trubaç ve Bekir Degermencini yaqaladılar. Rusiye FSBsiniñ Qırım boyunca idaresi yaqalanğan faaliyetçilerni Türkiye vatandaşından «aqsız yerde hususan büyük miqdarda para talap etüv»de qabaatlay.
Qırımtatar faaliyetçileriniñ yaqalanuvı esnasında qırımtatar milliy areketiniñ veteranı Veciye Kaşka yaramadı. Adise yüz köstergen yerinden onı «acele yardım» alıp ketti. Daa soñra qadınnıñ vefat etkeni belli oldı.
Noyabrniñ 24-nde Rusiyeniñ kontroli altında bulunğan Aqmescitteki Kyiv rayonı mahkemesi yaqalanğan qırımtatar faaliyetçilerini 2018 senesi yanvarniñ 15-ne qadar apiste qaldırdı.
Rusiye tarafından ilhaqından soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqası bar dep şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.