Marlen Asanovnı bütün Bağçasaray musulman adetine köre alğan Suleyman adınen tanıy. Asanov – turistler arasında qırımtatar koloriti ile meşhur olğan «Salaçıq» adle yerli kervan-sarayınıñ saibi.
«Salaçıq»ta İslâm ananelerine er vaqıt itina ile riayet ete ediler: içki ve domuz eti – yasaq, aqaylarnen apaylar bir-birinden ayrı çalışa, ayaqçıları tek aqaylar, mubarek Ramazan ayında restoran qapatıla edi.
Bağçasarayda «Salaçıq» kafesi
Lâkin Bağçasaraydaki restoran saibi ve dört balasınıñ babası Marlen (Suleyman) Asanov bir an içinde «Hizb ut-Tahrir»niñ «terroristik ücreniñ teşkilâtçısı»na çevirildi.
Marlen (Suleyman) Asanovnıñ balaları – Said (11 yaşında) ve Safiye (4 yaşında)
Oktâbrniñ 11-nde tañ vaqıtta Asanovlar qorantasınıñ evine telükesizlik hadimleri bastırıp kirgende aile başı yañıçıq saba namazını qılıp camiden qayttı ve işke ketmezden evel biraz raatlanacaq edi. «Balalar pek qorqtı, – hatırlay Marlen (Suleyman)nıñ ömür arqadaşı Ayşe. – Babalarınıñ qolları buğavlı, ev silâlı adamlarnen tolu. «Bular»dan biri oğullarımıznıñ yanına kelip: «Qorqmañız, biz mında yalıñız kino çıqaramız. Kino ne olğanını bilesizmi?» – dedi.
Ayşe Asanova
Ayşe balalarınen resim çıza
Ayşe pek duyğulanıp aqayı aqqında ikâye ete: «Bilesizmi, evimde eñ çoq sevgen bir vazam bar. İşte o, aqayım evde olğanda iç bir vaqıt boş turmay edi», – dey qadın, közyaşlarını silip.
Eskender (6 yaşında), Ayşe ve Safiye
Safiye resimni çızıp bitirdi
Qadın, aqayınıñ işi çoq olğanına baqmadan, eñ müimi olğan – Allah ve balaları içün o, er zaman vaqıt tapa edi, dey.
Said ve Mamut (9 yaşında) Bağçasarayda evde masa tennisi oynaylar
Eskender
Ayşeniñ aytqanına köre, Marlen (Suleyman) Qırımda qalmaq qararında iç bir vaqıt şübhelenmedi. O: biz qardaşlarımızğa yardım etmek kerekmiz, dey edi. Öyle de oldı: diger faaliyetçilernen birlikte o, terrorizm şübhesi ile tevqif etilgen Qırım sakinleriniñ qorantalarına yardım ete, mahkemelerine bara, olar aqqında içtmaiy ağlarda yaza edi.
Eskender resim üstünde çalışa
Safiye
«Tintüv vaqtında o, metanet ve ırız kösterdi. Ve men oña: «İnşaAllah, saña uymaq içün men de böyle apay olacam, men de böyle metanetli olacam», dedim», – dey Ayşe.