Dekabrniñ 8-nde Rusiyeniñ kontroli altında bulunğan Aqmescitteki Kyiv rayonı mahkemesi «Hizb ut-Tahrir işi» figurantı Server Zekiryayevniñ advokatı tarafından tahqiqatçınıñ qanunğa zıt kelgen areketlerine qarşı berilgen şikâyetni red etti.
Zekiryayevniñ advokatı Aleksey Ladinniñ Qırım.Aqiqatqa bergen izaatına köre, daa evel tahqiqatçı, onıñ advokatlar tarafından berilgen arizalarnıñ baqıluvı neticesinde alınğan qararlarnıñ kopiyalarını bermek ricasını red etip, bu vesiqalarnı resimge çıqarmaqnı da yasaq etti.
«Em Rusiyeniñ Anayasa mahkemesi, em de Yuqarı mahkeme defalarca imayeniñ talaplarını qanuniy ve tahqiqatçınıñ böyle areketlerini qanunsız tanıdılar, lâkin akem, şikâyetimiz boyunca musbet qarar çıqarmaq içün esas tapmadı», – dedi Ladin.
Daa evel Aleksey Ladin, imayesi altında bulunğan Bağçasaraydaki «Hizb ut-Tahrir işi»niñ figurantı Server Zekiryayevge qarşı yapılğan tahqiqatta qalplıq etilgenini bildirdi. Onıñ aytqanına köre, qabaatlanğan sıfatında celp etilüv aqqındaki qararda başta başqa bir adamnıñ adı yazılğan edi. Daa soñra tahqiqatçı qarardaki yapraqnı, Zekiryayevniñ soyadı yazılğan yapraqqa deñiştirdi.
Qırım Rusiye tarafından ilhaq etilgen soñ yarımadada mustaqil jurnalistler, tsivil faaliyetçiler, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqası bar dep şübhe altında tutulğan Qırım musulmanlarınıñ evlerinde ketken sayın daa sıq surette kütleviy tintüvler yapıla.
Halqara siyasiy İslâm teşkilâtı «Hizb ut-Tahrir»niñ vekilleri öz vazifesini, bütün musulman devletlerini bir İslam hilâfeti içinde birleştirüvde köreler. Lâkin olar buña irişmek içün terroristik usullarnıñ qullanıluvını red ete ve Rusiyede aqsız yerde taqip etilgenlerini aytalar. 2003 senesinde Rusiyeniñ Yuqarı mahkemesi «Hizb ut-Tahrir»ni, «terroristik» tanılğan 15 birleşmeniñ cedveline kirsetip, yasaq etti.