Yalta sakini Yunus Maşaripov, FSB hadimleri tarafından eziyetlengenini iddia ete. Dekabrniñ 1-nde Azatlıq Radiosı bildirgeni kibi, Maşaripov olıp keçkenlerni arizasında yazıp, metnini Ukraina prezidenti Petro Poroşenko ve FSBniñ Qırım ve Aqyar boyunca idaresiniñ rehberi Viktor Palaginge yolladı.
Muarririyet, Maşaripovnıñ arizasından parçalar ketirip, 2017 senesi sentâbrniñ 27-nde belli olmağan şahıslarnıñ oña ucum etip, köteklegenlerini ve ondan soñ Yaltadaki FSB idaresiniñ binasına ketirip, anda qıtadaki Ukrainağa sıq-sıq barğanı aqqında sorğulağanlarını, bildirdi.
«O, 2014 senesinden berli aq-uquq qoruyıcılıqnen oğraşıp, «balalar, saqatlar ve pensionerlerge qarşı yapılğan aq-uquq buzuluvlarını teşkilâtlarğa bildirgenini» söyledi. Ondan soñ Maşaripovnı urmağa ve elektrik ceryannen eziyetlemege başladılar. Aq-uquq qoruyıcısı, öz-özüne iftira atmağa mecbur etilgenini söyley. Maşaripovnıñ aytqanına köre, eziyetlevler neticesinde yapqan itiraflarda o, «SBU agenti olğanını ve olarnıñ vazifelerini eda etkenini» söyledi. Oña itiraflarını kinokamera qarşısında söyletip, bir qaç dübl çıqardılar, – denile bildirüvde.
Maşaripovnıñ aytqanına köre, oña qarşı patlayıcı tertibatnıñ işlep çıqarğanında qabaatlav boyunca cinaiy iş açıldı. İşniñ malzemelerinde, bu tertibat Aqyar şossesinde, Arhistratig Mihail ibadethanesinden 50 metr uzaqlığında tapıldı, dep bildirile.
Sentâbrniñ 27-nde Kremlniñ kontroli altında bulunğan Yalta mahkemesi Maşaripovnı eki ayğa tevqif etti. Oturışuv esnasında Maşaripov eziyetlengenini bildirdi, lâkin mahkeme buña emiyet bermedi. Maşaripov, Anayasanıñ 51-nci maddesi boyunca ifade berüvden vazgeçti, dep bildire Azatlıq Radiosı.
«51-nci madde boyunca eziyetlevler neticesinde bergen ifadelerimden vazgeçkenim içün al-azırda FSB hadimleri meni cezalav ile, ömürlik ruhiye hastahanesine yerleştirecekleri ile qorquzalar.
Rusiye telükesizlik müessiseleri qırımlınıñ beyanatını izalamaylar. Ukraina prezidenti memuriyetinde, Yunus Maşaripov yazğan arizanıñ ellerinde olıp olmağanı aqqında bilgi bermeyler.
Rusiye tarafından yapılğan ilhaqından soñ Qırımda jurnalistler, faaliyetçiler ve cemiyet erbaplarınıñ evlerinde sıq-sıq tintüvler yapılıp, özleri sorğulana. Aq-uquq qoruyıcıları bunı siyasiy muhaliflerge qarşı küreş olaraq köstereler.
Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti. 2015 senesi oktâbrniñ 7-sinde Ukraina prezidenti Petro Poroşenko munasip qanunnı imzaladı. Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey.