Noyabrniñ 27-nde Kreml nezaretindeki Kiyev rayon mahkemesi «Tebliğ Cemaatı işi» boyunca tutulğan Renat Suleymanovnıñ apishanede qaluv muddetinen bağlı meseleni baqacaq.
«Qırım uquq qorçalama gruppası» bildirgenine köre,bu işni, işbu davanıñ diger iştirakçisi olğan Arsen Kurbedinovnıñ apis muddetine qarar bergen qadı Anton Tsekurenko yürsetecek eken.
Qırımdaki Rusiye FSB idaresi oktâbrniñ 2-nde «Tebliğ Cemaatı» islâm teşkilâtınıñ üç üceyresi yoq etilgeni aqqında esabat bergen edi.
Kreml nezaretindeki Aqmescitniñ Kiyev rayon mahkemesi oktâbrniñ 3-nde «Tebliğ Cemaatı» teşkilâtda iştirak etkenlerinde qabaatlap, üç Qırım sakini - Renat Suleymanov, Arsen Kubedinov ve Talât Abdurahmanovnı apiske qapatqan edi.
Qırım yarımadası Rusiye tarafından ilhaq etilgen soñ, yarımadada FSB tarafından muntazam surette jurnalistler, failler, cemaatçılar tintile ve sorğuğa çekile. Uquq qorçalayıcılar bunı farqlı tüşüngenlerge qarşı olğanlarğa küreş dep tanıy.