Noyabrniñ 24-nde Aqmescitte Kyiv rayonınıñ mahkemesi tünevin yaqalanğan qırımtatar faaliyetçilerinden biri Bekir Degermenciniñ apis müddetini daa eki ayğa, yanvarniñ 15-ne qadar uzattı. Bunı Azatlıq Radiosınıñ muhbiri bildire.
Advokat Edem Semedlâyev oturış vaqtında ev apisi istegen edi.
Rusiye telükesizlik hadimleri, qırımtatar faalyetçileriniñ evlerindeki tintüvler esnasında silâ, narkotikler ve ekstremistik malzemeler tapqanlarını iddia eteler.
Noyabrniñ 23-nde kündüz ilhaq etilgen Aqmescitte telükesizlik hadimleri bir grup qırımtatar faaliyetçilerini yaqaladılar. FSB yaqalanğanlarnı, Qırımtatar Milliy Meclisiniñ azaları olaraq kösterdi. Qırımtatar halqınıñ temsiliy organında bu malümat red etildi.
Bir grup qırımtatar faaliyetçileriniñ işbu yaqalanuvı esnasında qırımtatar milliy areketiniñ veteranı Veciye Kaşka yaramay oldı. Adiseniñ yüz köstergen yerinden onı «acele yardım» alıp ketti. Daa soñra qadınnıñ vefat etkeni belli oldı.
Ukrainanıñ qıtadaki qısmında bulunğan QMC Prokuraturası noyabrniñ 23-nde qanunsız tintüvler, yaqalavlar ve qırımtatar milliy areketiniñ veteranı Veciye Kaşkanıñ ölümi vaqiaları boyunca cinaiy işler açtı.
Rusiye tarafından yapılğan ilhaqından soñ Qırımda mustaqil jurnalistler, vatandaş faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtınen alâqası bar dep zan etilgen Qırım musulmanlarınıñ evlerinde sıq-sıq tintüvler yapıla.