Noyabrniñ 18-nde Sankt-Peterburgda «Strategiya-18» teşebbüsi iştirakçileriniñ qırımtatarlarğa qoltutmaq maqsadınen ananeviy tedbiri ötkerilecek. Bunı tedbirniñ iştirakçileri içtimaiy ağlarda bildireler.
«Müddetsiz tedbirniñ maqsadı, Rusiye rejimi tarafından bütün bir halq – qırımtatarlarğa qarşı başlatılğan terrorğa keniş cemaat kütleleriniñ diqqatını çekmek... Noyabrniñ 16-sına keçer gecesinde Cafer Mametovnıñ evi qurşunğa tutuldı, uquqqoruyıcı Zair Smedlâğa qorqutuv mesajları kele, aynı künü bir qaç kişiniñ ve şu cümleden İçki (şimdi Sovet) rayonı Eski-Esen (şimdi Puşkino) köyüniñ qırımtatar tili ocapçesi Mustafayeva Lenara ve onıñ qaynanası Acer Mustafayevanıñ evlerinde tintüvler yapıldı», – dep yaza tedbirniñ teşkilâtçıları.
Sankt-Peterburg ve Moskvanıñ faaliyetçileri, qırımtatarlarnıñ 1944 senesi mayıs 18-nde sürgün etilüvi hatırasına «Strategiya-18» dep adlandırılğan müddetsiz tedbir içün birleştiler. İlhaq etilgen Qırımdaki vaziyetni tanıtmaq, Rusiye cemaatçılığına insan aq-uquqları ve urriyetleriniñ bozuluvı vaqiaları aqqında haber bermek içün faaliyetçiler er aynıñ 18-nci künü soqaqlarğa çıqalar.
Rusiyeniñ muhalif faaliyetçileri siyasiy mabüslerni azat etmek, Rusiyeniñ Ukrainağa qarşı tecavüzini toqtatmaq, Qırımnıñ işğaline soñ qoymaq talaplarınen muntazam surette barışıqlı piketler ve tedbirlerge çıqalar.