Noyabr ayınıñ ilk künlerinde Rusiye küç idaresiniñ hadimleri Bağçasaray, eski Qırım, Şumhay (Zareçnoye) ve İslâm Terekte (Kirovskoye) yaşağan qırımtatarlarınıñ evlerinde tintüv keçire. Faallerniñ malümatına köre, altı kişini politsiyağa alıp keterek, soñradan beşini qoyıp yibereler. Tutılıp alınğanlar arasında bağçasaraylı faal Seytumer Seytumerov da bar edi. Kreml nezaretindeki mahkeme oña, beş yıl evelsi ictimaiy ağlarda «Hizb ut Tahrir» timsali altında derc etken malümatı içün eki biñ rublelik cöreme töleme qararı çıqara.
Ondan soñ, noyabrniñ 8-nde, Rusiye küç idaresiniñ hadimleri Qırım memuriy sıñırında «Hizb ut Tahrir» davası» boyunca apiske alınğan beş kişiniñ qadınlarınen beraber ketken «Bizim balalar» teşkilâtınıñ qadın temsilcilerini toqtatalar. Olarnıñ episi Hersonğa bala vesiqalarını yaptırmaq içün kete eken. Qadınlarnı bir qaç saatlıq «ilâve teşkerüvden» keçirgen soñ qoyup yibereler, lâkin bu arada eki kere «acele yardım» çağırmağa mecbur qalalar.
Azatlıq radiosınıñ muhbiri Anton Naumlük, Rusiye küç idaresiniñ hadimleri bili-bile faallerge zorluqlar çıqarmağa tırışalar.
«Hizb ut Tahrir» davası» iştirakçileriniñ ömür arqadaşlarını yedi saat tutıp sorğulağanlar, soyundırıp üst başlarını teşkergenler. Olarnı ezilgen alda ancaq, advokatlar muracaat etken soñ qoyıp yibergenler. Rusiye sıñırcıları domuz kibi davranğanlar.
Daa evel mahkemege çekilgen faallerge kelecek olsaq, birini cöreme töleme qararı, digerine ise – 15 künlük memuriy apis cezası çıqarıla. Rusiye qanunına köre qabaat, ekstremizm materialınıñ derc etilgen vaqtından degil de, onıñ qayd etilgen vaqtından itibaren sayılıp başlay. Eger paylâşuv 2012 senesi birisiniñ saifesinde bulunsa bile, küç idaresiniñ hadimleri memuriy davanı şimdi de başlatabileler.
Bu sefer olar, yapılğan bir tintüv esnasında teşkilât yapqan bütün işler aqqındaki malümat bulunğan bilgisayarnı alıp keterek, «Qırım berdemliginen» onıñ faallerine darbe endirmege teşebbüs köstereler.
Anton Naumlük
Anton Naumlük qayd etkenine köre, vatandaşlarnıñ «Qırım birdemligi» adı altında çalışqan bu birleşme açıq faaliyet yürsete edi, onıñ içün muhbir, küç idaresiniñ hadimleri yañı bir şey tapamazlar, dep tüşüne.
– Çekip alınğan bilgisayarda taqiqatçılar ancaq canlı efirde numayış etilgen mahkeme toplaşuv videorolikleri ve soy-sopları aqqında ikâye etken siyasiy mabüslerniñ ikâyelerini tapabilirler. Taqip etmelerine bir sebep yoq, bir de resmiy olaraq «Qırım birdemliginiñ» faaliyetini yasaqlamaq imkânsız. Kerçek, bazı malümatlarğa köre, akimiyet organları işbu birleşmeniñ işini maksimum zorlaştırmağa areket eterler denilmekte. «Qırım birdemligi» faaller,niñ evlerinde tintüv yapılğanda çekilgen videolarda olar saqlanmayıp, küç idaresi hadimleri artından taqip etkenlerini qolaylıqnen añlamaq mümkün.
- «Qırım birdemliginiñ» faali Server Mustafayev eminliknen, teşkilât siyasiy mabüslarğa qol tutmağa devam etecegini bildirmekte.
Bizler işimizni toqtatmağa ya da oña yanaşuv şeklini deñiştirmege niyetimiz yoq. Biz qanunğa zıt kelecek iç bir şey yapmadıq.Server Mustafayev
– Qırımda qabul ve musaade etilgen tarzğa köre farqlı fikir yürsetmek, farqlı tüşüncege saip olmaq yañlış dep sayıla ve onı bastırmağa areket eteler. Bunıñ Rusiye qanunlarınen asla alâqası yoq. «Qırım birdemligi» - bu tabiy olaraq birleşken siyasiy mabüslerniñ qadınları, anaları ve balalarıdır. Apiske alınuvnen memuriy apisler bitmey, mahkemeler ep yañı cezalar kese, onıñ içün bu areket ep artıp barmaqta. Qırımnıñ tışında bile bir çoq insannıñ haberdar etilmesi de «Qırım birdemligi» sayesindedir. Tintüvlerden soñ bile, bizler işimizni toqtatmağa ya da oña yanaşuv şeklini deñiştirmege niyetimiz yoq. Biz qanunğa zıt kelecek iç bir şey yapmadıq.
(Matirialnıñ metin şeklini Vladislav Lentsev azırladı)