Qırım MC ve Aqyar Milliy politsiya Baş idaresiniñ alt bölügi işğal altındaki Qırımğa yaqın regionlarğa yerleştirilebile. Bu aqta Ukraina prezidentiniñ Qırım Muhtar Cumhuriyetindeki Temsilciliginiñ matbuat hızmeti bildirmekte.
«İşğalci akimiyet basqısı altına tüşken vatandaşlarnen daa da semereli iş alıp barılması maqsadınen, Qırım MC ve Aqyar Milliy politsiya Baş idaresiniñ alt bölügi tez vaqıtta işğal altındaki yerlerge yaqın keçirilmesine ayrı bir diqqat çekilgen edi», – denilmekte haberde.
Temsilcilikniñ matbuat hızmeti ayrıca, Qırım MC ve Aqyar Milliy politsiya Baş idaresi alt bölükleriniñ Hersonğa keçirilmesi Milliy politsiya ve mütenasip organlarnen uyğunlaştırılğanını bildire.
Qırım 2014 senesiniñ başında Rusiye tarafından ilhaq etilgeninden soñ Ukrainanıñ esas qısmı ve yarımada arasında memuriy, lâkin aslında tam bir «sıñır» peyda oldı. Memuriy sıñırda «Kalançak», «Çongar» ve «Çaplınka» olmaq üzre, üç kiriş-çıqış nezaret noqtası çalışmaqta.