Türkiyedeki Ukraina Elçiligi, Türkiye Cumhuriyeti vatandaşlarını noyabrniñ 6-7 künlerinde ilhaq etilgen yarımadada Qırım akimiyeti tarafından teşkil etilgen «teşviqat maqsatlı halqara tedbirleri»nde iştirak etüvden vazgeçmege davet etti.
Bunı noyabrniñ 6-sında Facebookta diplomatik müessiseniñ haber hizmeti bildirdi.
Diplomatik müessisede, Rusiyege tabi memuriyet noyabr 6-7 künlerinde Yaltada sözde «halqara» olğan «Zemaneviy halqara münasebetleri noqtai-nazarından Qırım» konferentsiyası ile «Qırım dostları» forumını ötkere, dep qayd ettiler.
Bildirüvde: «Ukraina, Rusiyeniñ areketlerini qatiyen taqbih etip ve olarğa Ukrainanıñ bağımsızlığı ile topraq bütünliginiñ bozuluvı olaraq qıymet kesip, Türkiyeniñ vatandaşlarını, Rusiye tarafından Ukrainanıñ ükmü altındaki topraqlardan bir qısmınıñ qanunsız ilhaqını qanuniyleştirmek maqsadınen yapılğan bu teşviqat maqsatlı ve provakatsion areketlerde iştirak etmekten vazgeçmelerine davet etti», – denilmeke.
Ukrainanıñ elçiliginde, Qırımğa Ukraina qanunları tarafından tayin etilgen tertipni bozıp kirilmesi içün Ukraina qanunlarında belli bir mesüliyetniñ tayin etilgenini hatırlattılar.
Yaltada noyabrniñ 6-sında «Qırım dostlarınıñ forumı» açıldı. Tedbir Livadiyada ötkerilmekte. Kremlniñ kontroli altında bulunğan Rusiye Devlet dumasındaki Qırım vekili Mihail Şeremet bildirgen malümatqa köre, yarımadağa 90-ğa yaqın çetel musafiri keldi.
Rusiye akimiyeti yarımadağa çetel musafirlerini davet etip, Qırımnıñ ilhaqını qanuniyleştirmek istey.
Ukrainanıñ qanunlarına köre, çetel vatandaşları Qırımğa yalıñız Ukraina qanunları ve halqara uquqınıñ normaları boyunca, Ukraina sıñırcıları tarafından kontrol etilgen keçit noqtalarından kire bileler.
AQŞ, Avropa Birligi ve daha bir qaç ülke Rusiyeniñ Ukrainağa qarşı istilâsı ve Ukrainanıñ toprağı olğan Qırımnıñ ilhaqından soñ er biri bir qaç paket sanktsiyalar tatbiq ettiler. Sanktsiyalar ayrıca Rusiye ve Qırımdan fizikiy ve uquqiy şahıslarğa qarşı qullanılmaqtadırlar. Sanktsiyalarnıñ bazıları Rusiye iqtisadiyatınıñ ayrı saalarına qarşı da qullanıla.
Ukrainanıñ Yuqarı Radası 2014 senesi fevral 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti. 2015 senesi oktâbrniñ 7-sinde Ukraina prezidenti Petro Poroşenko münasip qanunnı imzaladı. Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña “tarihiy adaletniñ tiklenmesi”, dey.