Keriç keçiti ava bozulğanı sebebinden vaqtınca öz işini toqtatqan soñ, bir daa çalışıp başladı. Bu aqta oktâbrniñ 30-nda Qırımdaki Rusiye MÇS idaresiniñ matbuat hızmeti bildirmekte.
Keçit işini yürsetken «Morskaya direktsiya» şirketiniñ malümatına köre, keçitte çalışqan gemilerniñ işi o andaki ava şartlarına bağlı.
Bu arada naqliyeciniñ sözlerine binaen, oktâbrniñ 30-ndan 31-ne keçer gecesi rüzgârnıñ küçlenmesi beklene.
«Gemilerniñ toqtama ihtimali pek yüksek», – denilmekte haberde.
Daa evel Qırımdaki Rusiye MÇS idaresi, Keriç keçiti oktâbrniñ 30-na saba, ava bozulğanı sebebinden öz işini toqtatqanı aqqında bildirgen edi.
Bunıñ arfesinde idare, ava bozulğanı sebebinden oktâbrniñ 30-na yarımadada furtuna telükesi vaziyeti kirsetilgeni aqqında esabat bergen edi.