Ukrain rejissöri Ahtem Seitablayev ümüt ete ki, qırımlılar Ekinci cenki vaqtında qırımtatar qadınınıñ qaramanlığı aqqında «Başqasınıñ duası» filmini uydu televideniye vastasınen körip olur. Bu aqta rejissör Qırım.Aqiqatqa bildirdi.
«Haytarma» misaline baqılsa, Rusiye ve Qırım kinoteatrlerinde «Başqasınıñ duası» filmi kösterilmeycek. Ümüt etem ki, film Qırım kinoteatrlerinde yarımada azat etilgen soñ kösterilir. Eñ yaqın vaqıtta ise uydu kanalları vastasınen körmek mümkün olur», – dedi Seitablayev.
Ahtem Seitablayev - ukrain ve qırımtatar oyuncısı, teatr ve kino rejissörı, stsenarist, Qırım Muhtar Cumhuriyetinde nam qazanğan oyuncısı.
O, 1944 senesi qırımtatar sürgünligi aqqında «Haytarma» filminiñ rejissörı ola. Mayısnıñ 18-de Kyivde onıñ «Başqasınıñ duası» filmi taqdim etildi. Yañı levhası Ekinci cian cenki vaqtında 88 yeudiy balasını ölümden qurtarğan qırımtatarı Saide Arifovağa bağışlana.