Ukrainadaki ABD elçihanesi Rusiye tarafından işğal etilgen Qırımda qırımtatar halqınıñ liderlerinden biri olğan Ahtem Çiygozge nisbeten çıqarılğan apis cezası qararını, yarımadadaki «daimiy basqılarnıñ nevbetteki misali» dep adlandırdı. Bu aqta diplomatik temsilcilik sentâbrniñ 12-nde Twitterdeki mikrobloglar ağında bildirmekte.
«Ahtem Çiygoznıñ esassız üküm etilüvi– Rusiye tarafından işğal etilgen Qırımda yapılğan daimiy basqılarnıñ nevbetteki misali. Qırım – Ukraina toprağı», – denilmekte haberde.
Unjustified conviction of Crimean Tatar leader Chiygoz latest example of ongoing oppression in Russia-occupied #Crimea. #CrimeaisUkraine pic.twitter.com/8arZskhw5K
— U.S. Embassy Kyiv (@USEmbassyKyiv) 12 сентября 2017 г.
Sentâbrniñ 11-nde Kreml nezaretindeki Qırım Yuqarı mahkemesi qırımtatar halqınıñ liderlerinden biri olğan Ahtem Çiygoznı 2014 senesi fevralniñ 26-nda Qırım Yuqarı Şurasınıñ binası ögünde kütleviy nizamsızlıqlar teşkil etmesinde qabaatlap, 8 yıllıq apiske mahküm etti.
Ukraina prezidenti Petro Poroşenko işbu davanı «Rusiye içün çıqarılğan daa bir üküm» dep adlandırdı.
Ukrainanıñ vaqtınca işğal etilgen territoriyalar nazirligi İnsan aqları Avropa mahkemesine ükümnen bağlı şikayet bermek niyetinde.
Ahtem Çiygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanıñ topraq bütünligine qol tutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qol tutqan edi.
«Çiygoz davasını» Rusiye mahkemesi qapalı toplaşuvda - qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.