İşğal etilgen Qırımnıñ Qarasuvbazar rayonı Üç Köz köyündeki Rus silâlı hızmetleri saba başlatqan tintüvi yekünlendi. Facebookta Qırım sakini Lilâ Osmanova bildirgenine köre, silâlı hızmet vekilleri tintüv keçirilgen evniñ erkelerini tutıp alğan.
Onıñ sözlerine binaen, silâlı hızmet vekilleri pek qaba davranğan, evdeki balalarnı pek qorqutqanlar.
«Qarasuvbazar rayonında tintüv bitti. Bu aileniñ bütün erkeklerini toplap alıp kettiler. Bir qız qardaşını da alıp ketecek olıp, soñundan vazgeçtiler. Sorğuğa çağıracaqlarını ayttılar. Balalar pek qorqtı. Pek qaba davranıp, qadınlarnı da qorquttılar. Atta kimsege iç bir türlü malümat bermesinler dep, cep telefonında laf etmekni bile yasaqladılar», – dep qayd ete Osmanova.
Bu saba Qırımnıñ Qarasuvbazar rayonı Üç Köz köyünde rus silâlı quvvetleri soqaqlarnıñ birini qapatqanları aqqında belli oldı. Köyniñ bir evinde tintüv keçirilgeni aqqında qırımtatar Meclisiniñ reisi Refat Çubarov haber etken edi.
Qırımda Kremlniñ nezaretindeki silâlı hızmetlerniñ saytlarında Qarasuvbazar rayonında er angi bir areketler yapılğanı aqqında iç bir şey bildirilmey.
Bir kün evel Rus silâlı hızmetleri İslâm Terek qasabasınıñ sakini, qırımtatarı Umer Emiramzayevniñ evinde tintüv ötkergen ediler. Tintüv esnasında o yaramağanı içün hastahanege alıp ketile. Şimdilik bu adam nede qabaatlanacağı aqqında bildirilmey.
Qırım Rusiye tarafından isğal etilgen soñ, mustaqil jurnalist, qırımlı faaller, qırımtatar halqı Meclisiniñ azaları ve Rusiyede yasaq etilgen “Hizb ut Tahrir” teşkilâtınen bağlı olmasında şeklengen Qırım musulmanlarınıñ evlerinde pek sıq şekilde kütleviy tintüvler keçirilip başladı.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.