Kremlge tabi olğan Qırım Yuqarı mahkemesi qırımtatar milliy areketiniñ yetekçilerinden biri Ahtem Çiygozğa nisbeten mahkeme qararını sentâbrniñ 11-nde ilân etecek. Bu kün «davada baqılğan malümatnıñ büyük kölemi» sebebinden tayin etilgen, dep haber ete Qırım.Aqiqat muhbiri.
Avgustnıñ 9-nda mahkmede eki tarafnıñ munaqaşaları yekünlendi ve Ahtem Çiygoz soñ sözüni ayttı. Bundan soñra mahkemeciler üküm çıqarmaq içün muşavere odasına ayırıldı.
Avgustnıñ 7-de Kreml kontrol etken Qırım Yuqarı mahkemesiniñ «Çiygoz davasınıñ» oturışında prokuror Anastasiya Suprâga Ahtem Çiygoz 8 yılğa azatlıqtan marum etilgenini istedi.
Ahtem Çiygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanñ topraq bütünligine qol tutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qol tutqan edi.
«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.