Keriçte, inşaatı yapılğan Qırım köpürine alıp barğan yol qurucılığı yanında evel qazılğan qadimiy «Gospitalnıy» qurğanı topraqnen kömülecegi aqqında qarar alınğanı aqqında haber etile.
Qadimiy mezarlıq milâttan evel IV asırğa aittir. Rusiyeli atiqiyatçılar onı yol qurucılığına azırlıq işleri esnasında tapqan edi.
Keriçte yol qurulacaq yerde «Gospitalnıy» qurğanınıñ qalımtıları
«Keriç – menim şeerim» web-saifesi haber etkenine köre, qadimiy qurğan kömülebilecegi aqqında Rusiye ilimler akademiyası Atiqiyat institutınıñ skit-sarmat arheologiyası bölüginiñ ilmiy hadimi İrina Rukavişnikova bildirmekte.
«Tekrar kömülme ihtimali, kerçekten de, yüksektir ve, bese-belli, öyle de yapılacaqtır, çünki qurğan büyük zarar körgen ve onı ğayırdan tiklenmesi imkânsız», – dep aytıla bildirüvde.
Keriçte «Gospitalnıy» qurğanınıñ qalımtıları
Rusiyeli arheologlar mayısnıñ 23-nde «Gospitalnıy» qurğanında qazma işleri yekünlengenini bildirgen edi. Qurğannıñ özü yernen bir etilmesi mümkün, çünki o yerde yol qurulmaq kerek.
Bundan evel Ukraina Medeniyet nazirliginde, istilâ etilgen Qırımda rusiyeli atiqiyatçılar tarafından yapılğan qanunsız qazma işleri munasebetinen bir sıra halqara teşkilâtlarğa muracaat etilecegi beyan etilgen edi.
Bundan evel, 2017 senesi fevral ayında, UNESCO işleri boyunca Ukraina Milliy Komissiyası ortaq devletlerni Rusiyeniñ işğaline oğrağan Qırımğa nezaret eyyetini yollamağa rica etken edi.