İyülniñ 29-nda Qırım uquq qorçalayıcı taqım tarafından istilâ etilgen Qırımda insan aqlarınıñ bozıluvları aqqında nevbetteki maruza taqdim etildi.
Vesiqada 2017 senesi mayıs ayında insan aqlarınıñ bozıluvınen bağlı adiseler ve apis etüv, tintüvler aqqında malümat taqdim etilgen.
Uquq qorçalayıcılar siyasiy sebeplerden açılğan cinay davalar aqqında tarif etti. Ayrıca «26 fevral davası», «Hizb ut-Tahrir davası», «ukrain diversanlarınıñ davası» ve «Vladimir Baluhnıñ davası» aqqında söz yürsetile.
«Fikir bildirüv ve söz serbestligi» bölügine qırımlı jurnalist Nikolay Semenanıñ davası, «İlmi Umerov davası» ve «Suleyman Kadırov davası» kirsetildi.
Ukraina Tışqı işler nazirligi (MİD) zapt etilgen Qırımda Ukraina vatandaşlarına qarşı basqı ve taqip areketleri yapılğanından raatsız olğanını defalarca bildire edi. Bunıñnen beraber MİD, Dünya toplulığına muracaat etip, bütün mumkün olğan siyasiy ve uquqiy imkânlar ile Rusiyege tesir etmege, onıñ totalitar usullarınen insan aqları ve söz serbestligini yoq etmesini toqtatmağa, ve apis etilgen ukrain siyasiy mabuslarnı azat etmege çağırdı.