Ukraina Tışqı işler nazirligi (MİD) «Dünya haridasında Qırım» leyhasınıñ ekinci basamağını başlata. O navigatsiya sistemaları ve mahsulatnen bağlı olacaqtır.
«Aktsiya çerçivesinde biz beraberlikte taqip etip, Rusiye tarafından işğal etilgen Qırım Muhtar Cumhuriyetiniñ elektron ve basılğan haritalarda hatanen işaretlengenini qayd etemiz. Böyle işbirlik sayesinde istilâ etilgen yarımadanıñ yañlış resimlerini endi defalarca tüzetebildik», – dep aytıla bildirüvde.
MİD bu aktsiyağa qoşulmağa davet ete ve hatalar tapılğan taqdirde muessiseni haberdar etmege çağıra.
«Bütün adiselerni qayd etemiz ve elçihanelerimiz vastasınen istisalcı-şirketlerniñ baş merkezlerine muracaat etip, halqara uquqnıñ qaidelerinde ve BMT Baş Assambleyasınıñ 2014 senesi martnıñ 27-nde qabul etkeni №68/262 rezolütsiyasına binaen, dünyada tanılğan sıñırlar çerçivesinde Ukrainanıñ topraq bütünligini tasdiqlaycaq şekilde, navigatsiya sistemalarındaki qusurlarnı tüzetmege rica etemiz», – dep bildire MİD.
Ukraina temsilcileri çetel şirketlerine devletniñ haritalarındaki nuqsanlarnı defalarca işaretlegen edi.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqid etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.