Filistin milliy memuriyetiniñ prezidenti Mahmud Abbas zorbalıq künü ve musulmanlarğa camige kirmege imkân berilmegen soñ İsrail ile bütün bağlarnı toqtatqanını bildirdi. Bunı iyülniñ 22-de Radio Svoboda haber ete.
Filistin prezidentiniñ aytqanına köre, İsrail Qudustaki cami etrafında quvetleştirilgen havfsızlıq tedbirlerini lâğu etkenine qadar onıñ memuriyeti İsrail ile bütün munasebetlerni toqtata.
İyülniñ 21-de üç israilli ve üç filistinli Qudustaki çatışmalardan soñ memlekette yüz bergen bir sıra adise neticesinde elâk oldılar.
Haber etilgenine köre, cuma künü aqşam filistinli biri üç israillini Urdunnıñ Ğarbiy yalısındaki Galamiş avropalı yerleşmesinde kesip öldürdi.
Bundan evel eki filistinli Qudusnıñ arap qısmında İsrail uquq qoruyıcılarınen çatışıp elâk oldı. Daa bir filistinli «ateş açılğan soñ» can berdi – adise yeri belli degil ve Qudus zıddiyeti ile alâqası-barmı yoqmı şimdilik haber etilmey.
Filistinliler İsrail uquq qoruyıcılarnıñ sıñırından keçmek içün taş atmağa başlağan soñ çatışmalar yüz berdi.
Bundan evel Qudusnıñ Eski şeerinde çoq biñli cuma namazları raat keçti; onıñ sıñırlarında müim bir musulman ibadethanesi yerleşmekte.
İsrail politsiyası 50 yaşını toldurğan ve ondan küçük musulman erkeklerine Eski şeerge kirmege yasaq etken soñ, qartlar ve qadınlar içün ise Eski şeerniñ qapularında maden qıdırıcılarnı qoyğan soñ musulman cemiyetiniñ liderleri kirişi yasaqlanmağan diger müminlerni de camige barmayıp, soqaqlarda ibadet etmege çağırdı.
İsrail uquq qoruyıcıları mezkür tedbirlerni iyülniñ 15-de olğan adiselerden soñ almağa qarar çıqardı. İsrail arapları Qudusnıñ Eski şeer kirişleriniñ birisinde ücüm etip, İsrail politsiyasınıñ eki hadimini öldürdi. O künü musulmanlarnıñ cuma namazı devamlı bir müddet içinde ilk sefer lâğu etilgen edi.
Qudusnıñ tarihiy Eski şeerinde em musulmanlar, em de yeudiyler içün muqaddes olğan bir bayır bar. VII asırda arap fethinden soñ anda «Qaya qubbesi» camisi, El Aksa camisi qurulğan edi. Yeudiyler içün bu İbadet dağı sayıla – olar içün eñ muqaddes yer, bir vaqıtları anda yeudiylikniñ baş ibadethanesi yerleşken edi, onı bir qaç kere yoq etkenler. Şimdi tek Közyaş divar ya da Ğarbiy divar qalğan.