Kreml kontrol etken Qırım Yuqarı mahkemesinde «Çiygoz davasınıñ» iyülniñ 6-da keçirilgen oturışına işğal etilgen Qırımdan Rusiye senatorı Olga Kovitidi keç qalıp keldi, dep bildire Radio Svoboda mühbiri. İmaye tarafı onı sorğuğa çekmege talap etken edi.
Kovitidiniñ sorğusı saat 12:00-da başlaycaq edi, lâkin bu vaqıtqa kelmegeni içün sorğusı avuştırıldı.
İyülniñ 5-de Kreml kontrol etken Qırım Yuqarı mahkemesi Çiygoznıñ imayesine Qırım müftisi Emirali Ablayevni sorğuğa çekmege kene izin bermedi.
İyülniñ 5-de «Çiygoz davasınıñ» oturışına işğal etilgen Qırımnıñ Rusiye parlamentiniñ deputatı Lentun Bezaziyev de kelmedi. O, «işte meşğul olğanını» ayttı.
Ahtem Çiygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanñ territorial bütünligine qol tutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qol tutqan edi.
«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.