Cumaaqşamı künü, iyülniñ 6-da, aqşam Kreml kontrol etken Bağçasaray mahkemesi Bağçasarayda qırımtatarlarnıñ evlerinde keçirilgen tintüvlerniñ şaatı Emil Belâlovğa «qanunsız mitingde» tekrar iştirak etkeni içün 150 biñ ruble (tahminen 66 biñ grivna – QA) para cezasını berdi. Bunı Qırım faali Server Mustafayev Qırım.Aqiqatqa bildirdi.
«Mahkemede videolar baqılğanda meraqlı bir şey oldı. Emil ve Emin egiz qardaşlar. Ağaları da bar. O, olardan büyük olsa da, pek oşaylar. Taqiqatçı videoda kim kim olğanını bilmey edi. Lâkin toplaşqan insanlar arasında olar da barlar dep qarar çıqarıldı. Mahkeme aynı madde boyunca ekinci bozuv olğan soñ 150 biñ ruble para cezasını bermege qarar aldı», – dep bildirdi Mustafayev.
Faalniñ aytqanına köre, protokol tizilgen Emin Belâlovnıñ mahkemesi olmadı.
«Taqiqatçı eki protokol tizdi, lâkin Eminni yibermege qarar aldı. Mahkeme bugün olmadı. Nege esaslanğanı belli degil. Mahkeme olacaqmı-yoqmı belli degil», – dedi o.
Mustafayevniñ bildirgenine köre, imaye tarafı «bir şeyge ümüt etmese de», mahkeme qararından şikâyet etecek ola.
İyülniñ 6-da saba işğal etilgen Qırımda Rusiye uquq qoruyıcıları Bağçasarayda qırımtatarlarnıñ evlerinde keçirilgen tintüvlerniñ şaatları Emin ve Emil Belâlovlarğa qarşı eki memuriy protokol tizdi.
Mayısnıñ 12-de Bağçasarayda Rusiye uquq qoruyıcıları musulmanlarnıñ evlerinde ve yerli qavehanede tintüvler keçirgen edi. Neticede 4 Bağçasaray sakini yaqalandı ve terrorizm ile qabaatlandı: Zevri Abseitov, Remzi Memetov, Rustem Abiltarov i Enver Mamutov. Olar Rusiyede yasaq etilgen «Hizb ut-Tahrir» teşkilâtında iştirak etmesinde şeklenip FSB hadimleri tarafından yaqalanğan ediler.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.