Qırımda cumaertesi künü, iyünniñ 24-de, doquz mesken noqtasında elektrik kesilgeniniñ sebebi küçlü yel olğan. 9 biñden ziyade insannıñ evinde ışıq yoq. Bunı işğal etilgen Qırımda Rusiye Fevqulâde vaziyetler nazirligi idaresiniñ matbuat hızmeti bildire.
«Ava vaziyetinden sebep (küçlü yel) Qırım Cumhuriyetiniñ mesken noqtalarından elektrikler kesildi. Saat 11.30-da 9 mesken noqtasında elektrikler kesildi. 9458 insan elektriksiz qala», – dep aytıla haberde.
Ava bozulğanınıñ aqibetlerini 15 taqım çezmekte (53 insan, 20 dane tehnika). Vaziyetni işğal altındaki Qırımda Rusiye Fevqulâde vaziyetler nazirligi kergin vaziyetleriniñ idare merkezi kontrol etmekte.