Rusiye prezidenti Vladimir Putin, Rusiyeniñ topraqları «istilâ telükesine kirgen taqdirde» işğal etilgen Qırım «elimizde olğan bütün imkânlarnen faydalanaraq» qorçalanacaq, dep bildirdi. Bu aqta Putin Showtime telekanalınıñ efirinde amerikalı kinorejissör Olıver Stone’ge bergen intervyusında söz yürsetti.
Ayrıca Putin «Qırım bütünley Rusiyeniñ bir parçası olğan soñ bizim o territoriyağa nisbeten munasebetimiz tamamile deñişti», dep ilâve etti.
Putin Qırım Rusiye tarafından zapt etilgeni aqqında aytır eken, bu adise - Qırım sakinleriniñ öz teşebbüsinen yapılğanı aqqında ayttı. «Qırımnı Rusiyege biz qoşmadıq, onıñ Rusiyege qoşulmasına Qırım sakinleri qarar berdi». Putin aytqanına köre, Rusiye «insanlarnıñ saylâvğa kelmesi içün» uyğun şartlar azırladı, yarımadada «iç bir türlü cengâver areketler olmadı, anda kimse ateş açmadı, kimse kimseni öldürmedi»
Oliver Stone’niñ «Putinden alınğan intervyu» adlı vesiqalı tsikli bu künlerde Showtime kabel kanalında numayış etilecek.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.