Qırımtatar Milliy Meclis reisi, Ukraina millet vekili Refat Çubarov, qırımlı siyasiy mabus Ahtem Çiygoznıñ anası hastalanğanını haber etti.
Çubarovnıñ sözlerine köre, Ahtem Çiygoznıñ anası – Aliye abla – onıñ oğlu 2015 senesi yanvar ayında apis etilgen soñ ağır hastalanğan edi. Bunen beraber, onıñ sözlerine köre, qadın «öz yaqınlarına alsızlığı aqqında bildirmemege tırışa» ve oğlunıñ azat etilecegine ümüt ete.
«Rusiye tarafından işğal etilgen Qırımda qırımtatarlarnıñ taqip etilmesi eñ yaqın adamlarğa – ana-babalarına, ömür arğadaşlarına ve ballarına tesir ete... Aliye abla, Lenara qızınen beraber Kyivke kelip, bir-qaç kün devamında mındaki hastahanelerde özüni baqtırdı. Kyivde yaşaqan qırımtatar ailelerine, Ahtemniñ anasını qayğırğanları içün teşekkür bildirem... Bügün Aliye abla Bağçasarayğa qayttı. Ramazan ayınıñ künlerinde Ahtem Çiygoznıñ ana-babasını – Aliye abla ve Zeytulla ağanı ziyaret etiñiz», – dep yazdı Refat Çubarov öz Facebook saifesinde.
Refat Çubarov qırımlı siyasiy mabuslarınıñ qorantalarını ziyaret etmege çağırdı.
Ahtem Çıygoz 2015 senesi yanvar ayında 2014 senesi fevralniñ 26-da Qırım Yuqarı Şurasınıñ binası ögünde Ukrainanñ territorial bütünligine qol tutulmasına bağışlanğan mitingde iştirak etkeni içün tutulğan edi. O zaman miting iştirakçılerine Rusiye tarafdarları, şu cumleden «Russkoye yedinstvo» firqasınıñ temsilcileri qol tutqan edi.
«Çiygoz davasını» Rusiye mahkemesi qapalı toplaşuvda: qırımtatar Meclisi yolbaşçısınıñ muavini sıfatındaki Ahtem Çiygozniñ davası olaraq ve ayrıca, davanıñ eki iştitakçisi olğan Ali Asanov ve Mustafa Degermenci davası şeklinde ekige ayıraraq, «26 fevral» davası çerçivesinde baqmaqta.