Qırım advokatı Edem Semedlâyev Qırımnıñ Yedi Quyu (Lenino) qasabasında yerli sakinniñ evinde tintüv keçirilgenini bildire.
«Bugün saat 7:30-da Yedi Quyu qasabasında Mambetşayev Nadirniñ evinde tintüv keçirildi. Tafsilâtlıca birazdan tarif eterim», – dep yazdı Semedlâyev Facebookta.
Qırım.Aqiqat tafsilâtlı malümat almaq içün advokatnen bağlanmağa tırışa. Mezkür haber diger qaynaqlardan şimdilik tasdıqlanmadı.
Kreml kontrol etken işğal altındaki Qırımnıñ uquq qoruyıcı organları tintüv sebeplerini izaatlamadı.
Rusiye Qırımnı işğal etken soñ yarımadada mustaqil jurnalistler, cemaat failleri, Rusiyede yasaq etilgen «Hizb ut-Tahrir» teşkilâtınen bağlı olğanlarında şeklengen Qırım musulmanları, qırımtatar Milliy areket failleri, Meclis azalarınıñ evlerinde tintüvler sıqlaştı.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.