Ukrainanıñ topraq bütünligine destek bildirmek içün keçirilgen miting. Ahtem Çiygoz – sadeve Qırımttatar Milliy Meclis reisiniñ öuavini degil. O menim eski dostım da ola, ve endi 2 yıl ve 3,5 ay devamında qanunsız surette Aqmescitniñ apishanesinde tutıla.
Ahtem Çiygoz esaretniñ maneviy ve cısmiy eziyetleri erkekçe cesür surette çıdamaqta. Ahtem Çiygoz bügün – öz halqına, ümde ve işançlarına, öz toprağına sadıq olmasınıñ nümünesidir.
Ahtem Çiygoz, arhivden alınğan resim
Men, Qırımtatar Milliy Meclis reisi olaraq, Aqmescitte 2014 senesi fevralniñ 26-nda Ukrainanıñ topraq bütünligine destek bildirmek içün keçirilgen mitingke tamamınen mesuliyetlim.
Ahtem Çiygoz bügün – öz halqına, ümde ve işançlarına, öz toprağına sadıq olmasınıñ nümünesidir
İşğal olunğan Qırımda bügün Ahtem Çiygoz ve Ali Asanovnen Mustafa Degermenciniñ aqqından keleler.
2014 senesi fevralniñ 26-nda olğan mitingniñ ketişatını ve Qırım Muhtar Cumhuriyetiniñ Yuqarı Şura binası qarşısındaki kütleviy vaqianıñ devamında areket etken taraflarnıñ davranış tarzı ve rollerini obyektiv olaraq ögrenmek – mahkeme içün iç te meraqlı olmağanı maña ayan-beyandır.
Bundan da ğayrı, Ahtem Çiygoznıñ ve başqa qırımtatarlarnıñ aqqlarını ezgen Rus işğalci mahkemesi, Rusiye tarafından, halqara uquqnı ve öz qanunlarını bozıp, vaqıtınca işğal etilgen topraqta adaletli qararlar çıqarmaq mümkün degil.
Ahtem Çiygoz ve başqa saiyasiy mabuslar, olarğa qarşı iddia etilgen qabaatlar ne qadar saçma ve toqal olğanını köstermek içün «mahkeme meydanlarını» qullanalar
Rus işğalci mahkemeniñ qararına dair hayallarımız yoq.
Amma, kene de, Ahtem Çiygoz ve başqa saiyasiy mabuslar – qırımtatarları – olarğa qarşı Rusiye işğalci akimiyeti tarafından iddia etilgen qabaatlar ne qadar saçma ve toqal olğanını bütün dünyağa köstermek içün «mahkeme meydanlarını» qullanalar.
Olğan vaziyette, 2014 senesi fevralniñ 26-nda kütleviy mitingniñ teşkilâtçılarından biri olıp, RF CK 456-ci maddesi esasında, Ahtem Çiygoznıñ imayesi tarafından esas şaat olaraq «mahkemede» şahsen sözge çıqmaq kerek olğanımı tüşünem.
Refat Çubarov, Qırımtatar Milliy Meclis resisi
«Bloglar» rubrikasında bildirilgen fikir-tüşünceler müelliflerniñ noqtaiy nazarını aks ettirip, muarririyetniñ baqışlarınen bir olmaması mumkün
(Refat Çubarovnıñ Facebook saifesindeki yazısından alınğan)