Qırımlı fail Riza İzetovnıñ evinde mayısnıñ 11-de saba ötkerilgen tintüv saat 9-ğa yaqın yekünlendi. İzetovnıñ özüni ise silâlı hızmet vekilleri alıp kettiler. Bunı Facebookta Radio Svoboda muhbiri Anton Naumlük haber etti.
Naumlük: «Riza İzetovnıñ evinde tintüv yekünlendi. Saat 6:15 başlap saat 9-ğa qadar devam etti. Rizanı alıp kettiler, advokat onıñ artından kete», – dep yazdı.
Vaqia şaatları İzetovnıñ evinde çekilgen video-qısımlarnı yayınladılar. «Kitaplarda, bese-belli, qarmalandılar. Er şey çıqarılğan, açılğan... Telefonlar, flash-card... İllâki birden mında teşkergendirler», – dep izaaylar şaatlar.
Mayısnıñ 11-de saba Mamaq (Strogovka) qasabasında Qırımlı fail Riza İzetovnıñ evini tinttiler. Şaatlarnıñ sözlerine köre, silâlanğan bölükler üç soqaqnı qapattı, Rosgvardiya, FSB ve Rus politsiyasınıñ hadimleri tintüvde iştirak etti.
Bundan evel Riza İzetovnı, başqa faillernen ve Article20 agentlikniñ muhbiri Taras İbragimovnen beraber, martnıñ 30-da Aqmescitte yaqalağan ediler.
Kremlniñ nezaretindeki silâlı hızmetlerde bu tintüvniñ sebeplerini izaatlamadılar.
Rusiye Qırımnı işğal etken soñ yarımadada mustaqil jurnalistler, cemaat failleri, Rusiyede yasaq etilgen «Hizb ut-Tahrir» teşkilâtınen bağlı olğanlarında şeklengen Qırım musulmanları, qırımtatar Milliy areket failleri, Meclis azalarınıñ evlerinde tintüvler sıqlaştı.