Qırımnıñ Qapsihor (Morskoye) köyünde mayısnıñ 8-de uquq qoruyıcılar qırımtatarı Yusuf Toroznıñ evinde tintüv keçireler. Bunı qırımtatar faili Lenora Dülber Qırım.Aqiqatqa bildirdi.
«Toroz Yusufnıñ evine keldiler. Tintüv sebebi şimdilik belli degil. Qorantada fail yoq, hocalıqnen oğraşalar. Toroz oturğan maalle kirişinde uquq qoruyıcılar tolu avtobus tura, evniñ yanında – ekincisi. Urbalarında SOBR (mahsus taqım – QA) işareti, uquq qoruyıcılarnıñ üstünde qurşun keçirmegen yelek ve yanında avtomatları bar», – dep tarif etti Dülber.
Onıñ aytqanına köre, qırımlınıñ evine kimse yaqlaştırılmay, uquq qoruyıcılar evniñ ekinci qatını baqıp çıqqan soñ birinci qatında tintüv keçirmege başladı.
Rusiye uquq qoruyıcılarnıñ izaatları şimdilik yoq.
Mayısnıñ 8-nde saba Lenora Dülber qırımtatarlar toplu yaşağan Qapsihor köyü silâlı insanlar tolu üç avtobusnen sarıp alınğanını bildirdi.
«Bundan evel bu avtobuslar Sudaq-Qapsihor yolunı qapattı, 20 daqqa devamında avtobuslar kirsetilmegen edi», – dedi Dülber.
Rusiye Qırımnı işğal etken soñ yarımadada mustaqil jurnalistler, qırımtatar failleri, Rusiyede yasaq etilgen «Hizb ut-Tahrir» teşkilâtınen bağlı olğanlarında şeklengen Qırım musulmanları, Meclis azalarınıñ evlerinde tintüvler sıqlaştı.