Kreml kontrol etken Qırım Yuqarı mahkemesi Bağçasaraylı «Hizb ut-Tahrir davasınıñ» mabüslerine ceza berilmesinen bağlı şikâyet arizalarını qanaatlendirmege razı olmadı. Bunı Qırım advokatı Edem Semedlâyev aprelniñ 25-nde video muracaatında ayttı.
«Mahkemeci mabüs ve advokatları bergen şikâyet arizalarını red etti. Mahkeme oturışı qapalı şekilde keçirildi. Sebebi ne degen sualge mahkemeci cevap bermedi, aprelniñ 24-de çıqarılğan qararnı seslendirdi. Advokatlarnıñ qolunda aprelniñ 25-nde çıqarılğan qararlar bar edi, anda ise oturış açıq olacağı yazılğan edi», – dep bildirdi advokat.
Böylece eski qarar qala.
Aprelniñ 9-nda Qırımdaki mahkeme Bağçasaraylı «Hizb ut-Tahrir davası» mabüsleriniñ apis müddetini bir ayğa uzattı.
Keçken sene mayısnıñ 12-nde Bağçasarayda Rusiye uquq qoruyıcıları musulmanlarnıñ evlerinde ve yerli qavehanede tintüvler keçirgen edi. Neticede 4 Bağçasaray sakini yaqalandı ve terrorizm ile qabaatlandı: Zevri Abseitov, Remzi Memetov, Rustem Abiltarov i Enver Mamutov. Olar Rusiyede yasaq etilgen «Hizb ut-Tahrir» teşkilâtında iştirak etmesinde şeklenip FSB hadimleri tarafından yaqalanğan ediler.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.