Ukraina boksçısı Vladimir Kliçko qırımlı Aleksandr Usikni Dünya boks teşkilâtınıñ versiyasında ağır çekide (91 kg qadar) amerikan Maykl Hanter ile uruşta dünya çempionı unvanını qorçalağanını hayırladı.
«Aleksandr Usikniñ kruzerveytte (birnci ağır çekide – QA) unvanını qorçalağanı hayırlı olsun, daa çoq ğalebe olacaq!», – dep yazdı Vladimir Kliçko Twitterde.
Congratulations to @AleksandrUsyk for successful cruiserweight Titel Defence and many more to come! #Usyk pic.twitter.com/DojgeQ4XYO
— Klitschko (@Klitschko) 9 Nisan 2017
Ukraina boksçıları Aleksandr Usik, Aleksandr Gvozdik ve Vasliy Lomaçenko aprel 9-da Amerika Qoşma Ştatlarındaki MGM National Harbor arenasında boks uruşlarını keçirip, ğalebe qazandılar.
Qırımlı Aleksandr Usik Dünya boks teşkilâtınıñ versiyasında ağır çekide (91 kg qadar) dünya çempionı unvanını qorçaladı. Üç qadı ukrainge rey berdi, neticede uruş esabı 117-100 oldı.
Qırımlı Aleksandr Usik ğalebe qazanğan soñ konferansye Maykl Baffer Amerika Qoşma Ştatlarındaki MGM National Harbor arenasında onıñ doğuv şeerini «Aqmescit, Ukraina» dep ayttı.