Kremlniñ nezaretindeki Aqmescitniñ Merkeziy rayon mahkemesi «fevral 26 davasınıñ» oturışını 4 aprelge qaldırdı, sebep – dava iştirakçisi Arsen Yunusovnıñ yañı advokatı Vladimir Klimaşevskiy davanıñ vesiqalarınen tanış olması içün. Bunı mart 28 künü Qırım.Aqıqatqa bergen izaatında advokat Emil Kurbedinov bildrdi.
Kurbedinov: «Toplaşuvnı keçiktirdiler. Advokat (Vladmir Klimaşevskiy – QA) dava vesiqalarınen tanış olamq içün muracaatta bulundı, o endi davanı aldı. Bu sebepten oña aprel 4 kününe qadar vaqıt berdiler», – dep haber etti.
Advokat Vladimir Klimaşevskiy Rusiyeli mahkemeniñ qararını izaatlamağa istemedi.
Mart 23 künü Kremlniñ kontrol etkeni Aqmescitniñ Merkeziy rayon mahkemesi «fevral 26 davasınıñ» oturışını mart 28 kününe qaldırğan edi, sebep – davağa bağlı olğanlardan biriniñ advokatı yoq edi.
Mart 15 künü Kreml nezaretindeki Aqmescitniñ Merkeziy rayon mahkemesinde rusiyeli prokuror, advokat Cemil Temişevni «fevral 26 davasından» çıqarmaq muracatında bulundı.
Yunusovnıñ yañı advokatı Rusiyeli mahkeme tarafından tainlendi.
Fevral 27 künü rusiyeli advokat Nikolay Polozov, Qırımtatar Milliy Meclis reisiniñ müavini Ahtem Çiygoz mahkemesine bundan evel maküm olğan Eskender Nebiyev, Talât Yunusov ve Arsen Yunusovnı, sorğuğa çekmek prokurornıñ muracatı qabul qtilgeni aqqında haber etti. Sorğuğa çekilgenlerniñ üçü de 2014 senesi fevral 26 künü Qırım Yuqarı Şurası ögünde tutulanğannıñ areketleri aqqında iç bir şey aytmadılar.
Rusiyeniñ Qırım işğalinden soñ yarımadada 2014 senesi fevral 26-da Ukraina topraq bütünliginiñ tarafdarları mitinginde iştirak etken qırımtatar faallerini mahkeme etmege başladılar. Olarğa qarşı Qırımnıñ şimdiki yolbaşçısı Sergey Aksenovnıñ reberiyeti altında «Russkoye yedinstvo» fırqasınıñ faalleri çıqqan edi.
Rusiye mahkemesi iyül 20-de qapalı toplaşuvda «fevral 26 işini» ekige böldi: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.