Mart 27 künü Rusiye paytahtı Moskvanıñ Tverskaya rayon mahkemesinde Aleksey Navalnıyge qarşı açılğan memuriy dava baqılacaq. Qabarcılıqqa qarşı küreş Fondınıñ tesisçisi ve muqalifetçi keçende Moskvada şeer merkezinde akimiyetniñ ruhseti olmağan miting keçirilgeni künü tutılğan edi.
Navalnıynıñ ketirilgen mahkeme binasına eki saat devamında Rusiyeli muqalifetçini deteklegen faallerini ve jurnalistlerni yibermey ediler. QQKF tesisçisini izinsiz mitingniñ teşkil etilmesinde qabaatlaylar.
Navalnıynı mart 26 künü kündüz saat ekige yaqın, merasim daa başlanmazdan evel yaqaladılar. Onı Konkovo rayon politsiya bölügine ketirip gecege qaldırdılar. Aynı künü Qabarcılıqqa qarşı küreş Fondınıñ 17 hadimini de tuttılar, olarnı politsiyanıñ emirlerine boysunmağanlarında qabaatlaylar. Yaqalanğanlarğa qarşı açılğan memuriy davalar mart 27 künü baqılacaq. QQKF-nıñ ofisi müürlendi, andan tehnikanı çıqaralar.
Mart 26 künü Rusiyeniñ onlarce şeerlerinde qabarcılıqqa qarşı mitingler ötkerildi. Olarda onlarce ve biñlerce insanlar iştirak etti. Rusiye paytahtı Moskvada ruhsetsiz usulnen aktsiya Tverskaya soqağında kezüv şekilinde keçti. Farqlı malümatlarğa köre, oña 8-den 20 biñge qadar insan qoşıldı. Yaqalanğavlarnı nezaret etken Rusiyeli «OVD-İnfo» portalınıñ malümatına köre, aktsiya iştirak etken 1030 adam tutıldı.