«Hizb ut-Tahrir davasınıñ» «Aqmescit beşlisinden» biri Teymur Abdullayev qırımtatar tilinde mektüp yazğanı içün üç künden berli kartserde tutıla. Bunı advokatı Emil Kürbedinov Qırım.Aqiqatqa bildirdi.
Onıñ aytqanına köre, apis odada keçirilgen tintüv vaqtında SİZO hadimleri Abdullayevniñ qorantasına qırımtatarca yazğan mektübini taptı. Mektüp alındı. Abdullayev onı qaytarmağa talap etti, erkekni ise kartserge attılar.
Your browser doesn’t support HTML5
Tuvğanlarına qırımtatarca mektüp yazğanından kartserge atıldı (video)
Advokat bildirdi ki, bunı basqı olaraq köre ve izolâtor memuriyetiniñ areketlerinden şikâyet etecek ola.
Oktâbr 12 künü Qırımda beş musulman ailesiniñ evinde tintüvler keçirilgen edi. Böylece, beş qırımtatarı yaqalandı ve Rusiyede yasaq etilgen «Hizb ut-Tahrir» teşkilâtında iştirak etkenlerinde qabaatlandı: Rustem İsmailov, Uzair Abdullayev, Teymur Abdullayev, Emil Cemadenov ve Ayder Saledinov.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.