Mart 21-de «Çiygoz davasınıñ» 90-ıncı oturışında imaye tarafı Kreml kontrol etken Qırım Yuqarı mahkemesinde deliller köstermege başladı. Bunı yaqalanğannıñ advokatı Nikolay Polozov bildirdi.
Onıñ aytqanına köre, imayeniñ birinci şaatı Zair Smedlâyev oldı.
«Oturışnıñ birinci qısmında fevral 25 ve 26 künleriniñ vaqialarına dair ifade berdi. Fevral 26-da Qırım Muhtar Cumhuriyeti Yuqarı Şurasınıñ binası yanında miting degil de, piket ötkerilgenini tafsilâtlı añlattı... Ahtem Çiygozğa regional Meclislernen bağlanmağa emir etilmedi, gizli şaatlar bunı bildirgen edi. O, Yuqarı Radanıñ binası yanında piketni teşkil etmedi», – dedi Polozov.
Advokatnıñ bildirgenine köre, şaat, fevral 26-da saba Qırım Yuqarı Şurasınıñ binası yanında «Rus birligi» firqasınıñ tarafdarları endi bar edi, lâkin olarnıñ kütleviy tedbirleri saat 14:00-da başlaycaq edi, dep ayta.
Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, şu cümleden «Rus Birligi» firqası, miting iştirakçilerine qarşı çıqqan edi.
Rusiye mahkemesi iyül 20-de qapalı toplaşuvda «fevral 26 işini» ekige böldi: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.