Ukraina ve Türkiye mudafaa ve avacılıq saalarında eki taraflı işbirlikni muzakere ettiler. Bunı mart 14 künü ukrain akimiyetiniñ matbuat hızmeti bildirdi.
Ukraina baş naziri Volodımır Groysman, Türkiye baş naziri Binali Yıldırım ile körüşkende, eki devlet işbirlik imkânlarını yeterli qadar qullanmağanını ayttı.
Akimiyet yolbaşçısı: «Bir-qaç kelimenen aytacaq olsaq, bügün bizim kâinattan, kâinat uçuşlarında işbirlik suallerinden başlap, Ukrainanıñ terenliklerine qadar, işbirlik imkânlarımız bar. İşbirlik saamız ğayet keñiştir», – dep qayd etti, ve dedi ki, «devletler ukrain-türk uçaqlarını qurmaq mümkünler, olarnıñ reqabetli keyfiyeti olacaq ve özleri avacılıq bazarında kerekli olacaqlar».
Berilgen malümatqa köre, taraflar energetik işbirlikni de muzakere ettiler. Volodımır Groysman hatırlattı ki, martnıñ soñunda energetika meselelerine dair ukrain-türk iş gruppasının toplaşuvı ötkerilecek.
Keçende Groysman, Türkiye er angi türk gemilerine işğal etilgen Qırımnı ziyaret etmege yasaq etkenini bildi, ve, onıñ sözlerine köre, bu qarar «Ukraina ve Türkiye Cumhuriyeti arasında dostane musebetlerniñ olmasını qattı şekilde işaratlegen beyanattır».