Qırımda fevral 28-de ukrain ve qırımtatar faalleriniñ bir qaç mahkeme oturışı olacaq. Bunı Qırımtatar Milliy Qurultayı Merkeziy saylav komissiyasınıñ reisi Zair Smedlâyev Facebook saifesinde yazdı.
«Saat 14.00 Alimov Refatnıñ apiste yatma müddetiniñ uzatılmasından berilgen şikâyet arizası baqılacaq. Saat 14.00 Aqmescitteki Demir yol rayon mahkemesinde Nikolay Semenanıñ işinde ilk mahkeme toplaşuvı olacaq. Saat 16.00 İlmi Ümerov FSB idaresine, taqiqatçı Skripkağa davet etildi», – dep yazdı Smedlâyev.
Onıñ bildirgenine köre, Vladimir Baluhnıñ apis müddeti de uzatılacaqtır, mahkeme oturışınıñ saati daa belli degil.
Qırım Rusiye kontroline keçken soñ yarımadada FSB jurnalist, faal, cemaat erbaplarını sorğuğa çeke, tintüvler keçire, qırımtatarlarnı yaqalay. Uquq qorçalayıcılar bunı «farqlı fikirler ile küreş» dep adlandıra.
Ukraina baş naziriniñ Avropa ve Avropa atlantik integratsiyası meseleleri muavini İvanna Klimpuş-Tsintsadzeniñ bildirgenine köre, işğal başlağanından fevral 25-ne qadar Qırımda 12 insan elâk oldı, 17 ğayıp oldı, 39 siyasiy mabus oldı, olardan 10 kişi endi mahküm etildi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.