«Qırım diversantları işiniñ» mabusı Redvan Suleymanovnıñ apis müddeti Kreml kontrol etken Qırımdaki Kiyev rayon mahkemesi tarafından 2017 senesi mart 20-ne qadar uzatıldı. Bunı fevral 16-da Radio Svoboda mühbiri Anton Naumlük Facebookta bildirdi.
Apis müddeti qabaat qararı azırlansın ve mahkemege yollanılsın dep uzatıldı, dep qayd etti Suleymanovnıñ advokatı Emil Kürbedinov.
«Elbet de, apis müddetiniñ uzatılması içün esas sebep degildir. Ne sebepten uzatılğanına dair bir sıra iza bar», – dedi Kürbedinov. Qarar rayon mahkemesinden tış olğanını qayd etti.
2016 senesi dekabrniñ soñunda yazda Qırımda yaqalanğan «diversant» Suleymanov içün apis müddeti yanvarniñ soñuna qadar uzatılğanı habet etilgen edi.
«Ukrain diversion gruppasında» iştirak etmesi ile qabaatlanğan Redvan Suleymanov Aqmescitteki Taqiqat izolâtorında yata, onıñ davasında taqiqat devam etmekte.
Rusiye kütleviy haber vastaları FSB malümatına esaslanıp, Redvan Suleymanov iyül 30-da Aqmescit ava limanında yaqalanğanını bildirgen edi. Avgust 12-de Federal havfsızlıq hızmeti Suleymanov sorğuğa çekilgen videonı Rusiye matbuat vastalarına yolladı. Yaqalanğan dey ki, 2015 senesi oktâbr ayında Zaporojye şeerinde ukrain istihbaratı oña iş teklif etti. Suleymanovnıñ aytqanına köre, oña arbiy tehnikasınıñ areketleri aqqında malümat toplamağa emir etildi, soñra ise patlav maddeleri qoyulacaq yerlerni Aqmescit vokzalında ve ava limanında tapmağa avale etildi.
Avgust 10-da FSB bildirdi ki, avgust 7-ne keçer gecesi Qırımda yarımadada teraktlarnı azırlağan «ukrain diversantları» yaqalandı. Bundan evel Rusiye sıñırcıları üç kün devamında yarımada ile memuriy sıñırdaki kiriş ve çıqış noqtalarını blok etken edi.
Ukraina akimiyeti Moskva bergen malümatını inkâr etip, Rusiye mahsus hızmetleri «provokatsiya» yapa, dep bildire.