Avropa Şurası Parlament assambleyası Rusiye tarafından işğal etilgen Qırımda ve Ukrainanıñ şarqiy regionlarında söz serbestligi «telükeli vaziyette» olğanından raatsizlanğanını beyan etti. Bu aqta teşkilâtnıñ sitesinde haber etile.
PACE «Avropada kütleviy haber vastalarınıñ serbestligine cidden telükeli olğan adiselerden» rattsız ola. İşbu adiseler aqqında, Ukraina temsilcisi Volodımır Ariev maruza azırladı. Maruzada ayrıca 2015 senesinde 16 jurnalist öldürülgeni ve aza-devletlerdekizorbalıq areketleri aqqında tarif etile.
Kütleviy haber vastaları Azerbaycanda da taqip etilgeni munasebetinen raatsızlıq beyan etile, ve jurnalislerge ve bloggerlerge qarşı cinaiy qanunlar qullanılğanı sebebinden yazıqsınuv bildirile.
Ayrıca PACE «Türkiyede haber vastaları ve jurnalistlerniñ dramatik vaziyeti» ile raatsız olğanını ifadeley ve türk akimiyetini «terroristik eylemlerde iştirak etkenlerinde qabaatlanğan bütün jurnalislerni azat etmege» çağıra.
Parlament assambleyası «diger aza-devletlerniñ, fakt olaraq ayrılıqçı rejimler tarafıdndan kontrol etilgen topraqlarda, yani Azerbaycannıñ Dağlıq Qarabağında, Gürcistannıñ Abhaziyası ve Cenübiy Osetiyasında, Moldova Cumhuriyetiniñ Pridnestrovye bölüginde» kütleviy haber vastalarınıñ söz serbestligi yoq olğanına yazıqsına.
Bundan da qayrı PACE qayd ete ki, cemaat yayınlarınıñ akimiyetten mustaqil olğanı garantiya etilmek kerek.
Keçende Avropa Şurası Parlament assambleyasında Ukraina eyyeti, Qırım uquq qorçalav taqımı ve Qırımtatar Milliy Meclisi tarafından Strasburgda PACE qış sessiyası devamında «İşkence, zornen yoq oluvlar, siyasiy taqipler: Qırım adalet istey» (Tortured, disappeared, persecuted: Crimea is asking for justice) mevzusında yan merasimi teşkil etilgen edi.