«Dojd» telekanalınıñ baş müdiri Natalya Sindeyeva Ukrainada telekanal yasağı qararına yazıqsındı.
«Yazıq ki, Ukraina Milliy şurası böyle qarar aldı. Ukrainadaki provayderler ile tizilgen añlaşma şartlarına köre, «Dojd» IP-bağları üzerinden ticariy reklamasız bütün memlekette yayınlanmaqta. Ukraina Milliy şurasına bu malümat 2016 senesi avgust 8-de yetkizilgen edi, bundan soñ Dojd telekanalınıñ Ukraina qanunlarına zıt kelmesine dair malümat kelmegen edi», – dep izaatladı vaziyetni telekanal saytında Sindeyeva.
Onıñ qayd etkenine köre, «Dojd» Rusiye haritasını kösterip, Rusiye qanunlarına esaslana.
«Rusiye Federatsiyası Anayasasınıñ 65-inci maddesine köre Qırım Rusiye Federatsiyasınıñ subyekti ola», – dep ayttı Sindeyeva.
O, ukrain seyircisi telekanalnı sayt üzerinden ya da Smart TV ilâvesi vastasınen baqmağa imkânını tapar, dep ümüt ete.
Ukrainanıñ televideniye ve radio yayınları milliy şurası yanvar 12-de bildirdi ki, «Dojd» telekanalı memlekette yayınlanması izin berilgen çetel yayınları cedvelinden çıqarıldı. Telekanal Ukraina devlet sıñırlarını ve topraq bütünligini tanımağan levhalar köstergen edi.