Çetel ava şirketleriniñ yolcu uçaqları dekabr 1-de Ukraina silâlı quvetleriniñ raketa ateşleri keçirilgen alan olaraq ilân etilgen Qara deñiz üzerindeki ava boşluğını sarıp almağa başladı. Bunı «İnterfaks Ukraina» bildire.
«Kyiv vaqtına köre saat 9:00 El Al İsrail ava şikertiniñ Tel-Aviv-Kyiv ve «Türk hava yollarınıñ» İstanbul-Moskva seferi Odessadan cenüp tarafında Qara deñiz üzerinde qapatılğan ava boşluğınıñ ğarp çetinde qayd etildi», – dep qayd ete neşir.
Agentlikniñ malümatına köre, «Aqmescit» ava limanı cedvel boyunca çalışa, uçaqlar qona ve uça. Ava limanınıñ online levhası bunı köstere.
«Saat 10:00 berilgen malümatqa köre, dekabr 1-2 künleri Ukraina cenübindeki Qırım ile sıñırı olğan Herson vilâyetinde raketa ateşleri olsa da, uçaq seferleri lâğu etilmedi», – dep qoşa neşir.
«İnterfaks» haber etkenine köre, cumaaqşamı künü çetel yük gemileri Qırımdan ğarpqa taba Qara deñiz suvlarını terk etti.
Dekabr 1-de Ukraina Qırım ile memuriy sıñırda raketa ateşlerine başladı.
Noyabr 30-da «Zerkalo nedeli» neşiri Ukraina Mudafaa nazirligindeki qaynaqlarına esaslanıp, Rusiye tarafı ukrain raketalarını tüşürecegini bildirdi, dep yazğan edi. Bu malümat resmiy şekilde daa tasdıqlanmadı.
Rusiye Tışqı işler nazirligi Ukraina akimiyeti işğal olunğan Qırım ile sıñırında planlaştırğan raketa ateşleri «provokatsiya» ola dep, Moskva «sert bir şekilde cevap berecegini» aydınlattı.