Türkiye Tışqı işler nazirligi noyabr 25-de Türkiye Tışqı işler nazirliginiñ spikeri Hüseyin Müftüoğlunıñ Qırımğa seyaat etken Türkiye eyyetine dair beyanatını derc etti.
«Türkiye’den gayriresmi bir heyetin ahiren tamamen kendi girişimiyle, Bakanlığımızın görüş ve iznine başvurmadan Kırım’a gerçekleştirdiği seyahate ilişkin haberlerin yayımlandığı görülmüştür. Sözkonusu ziyaretin hiçbir resmi boyutu bulunmamakta olup, Türkiye’nin Ukrayna’nın egemenliğini ve Kırım dâhil toprak bütünlüğünü tanıma yönündeki siyasetinde herhangi bir değişiklik sözkonusu değildir», – dep ayttı Müftüoğlu.
Rusiye ve Rusiye kontrol etken Qırım haber vastaları çarşenbe künü, noyabr 23-de, işğal etilgen Qırımğa Moskvadan Türkiye vatandaşlarınıñ gruppası kelip çıqtı, dep bildirgen edi. Gruppa erkânına deputatlar, siyasetçiler, ükümetten tış teşkilâtlarnıñ vekilleri ve iş adamları kirdi, umumen – 22 insan. Olarnıñ arasında – «Avrasya Kalkınma Platformunıñ yolbaşçısı, Türkiye havfsızlığı Baş müdirliginiñ reber muavininiñ itibarlı şahsı Hasan Cengiz, Türkiye prezidentiniñ vekili İbrahim Erilli, Ankara şeer yolbaşçısınıñ muavini Ahmet Tunç ve digerleri».
Eyyetniñ daa bir qaç azası, şu cümleden Türkiye Büyük Millet Meclisiniñ Adalet ve Kalkınma partisiniñ deputatı, Türkiye prezidenti Recep Tayyip Erdoğannıñ mesleatçısı ve eki doğmuş qardaşı Mehmet Mutlu ve Türkiye parlamentiniñ AKP deputatı Mahmut Malli kelecek edi.
Hasan Cengiz ve onıñ yanında olğan insanlar Aqmescit ve Yaltanı ziyaret etip, Qırımnıñ Rusiye memurları ile körüşti. Ukraina qanunlarını bozğan ğayrı resmiy musafir Türkiyeniñ Qırım işğaline dair resmiy fikri deñişkenini bildirip, Türkiye reberiyeti adından memleketniñ itibarlı insanlarınıñ ziyaretini ilân etti.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ihlâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Birleşken Milletlerniñ Baş Assambleyası, NATO, OSCE ve Avropa Şurası ayrı rezolütsiyalarnı qabul ettiler. Türkiye iqtisadiy cezalarğa qoşulmadı, amma Qırımnıñ qanunsız işğalini takbih etken bütün rezolütsiyalarğa qotuttı. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra. Moskva Ğarpqa qarşı bir sıra sıñır tedbirni kirsetti.