Türkiye kütleviy haber vastaları oktâbr 31-de «Cumhuriyet» esas muhalifet gazetasınıñ baş muarriri yaqalanğanını bildire. Neşirniñ saytında aytıla ki, baş muarriri Murat Sabuncu ve yazıcı Güray Öz evlerinde keçirilgen tintüvlerden soñ yaqalandı. Bunıñ sebebi şimdilik belli degil. Bu aqqında Radio Svoboda bildire.
Olarnı vaiz Fethullah Gülen ile bağlı olmasınen qabaatlanğan şahıslarğa yapılğan basqı vaqtında yaqaladılar. Onı Türkiye akimiyeti iyül ayındaki devlet avdarması teşebbüsinen qabaatlay. Gülen qabaatlı olğanını inkâr ete.
Soñki aftalar içinde Türkiyede onlarnen kütleviy haber vastası, şu cümleden kürt neşirleri, qapatıldı.
«Cumhuriyet» gazetasınıñ sabıq baş muarriri Can Dündar, taqiqatçılarnıñ aytqanına köre, devlet sırı olğan malümatnı derc etkeninden altı yılğa qadar azatlıqtan marum etildi. Ğarp bu qararnı takbih etip, prezident Recep Tayyip Erdoğan zamanında Türkiyede insan aqlarınıñ vaziyeti kerginleşkeninden qasevetlengenini bildirdi.