Rusiye tarafından zapt etilgen Qırım ve Aqyardan er angi talebe Kyievde işini yañıdan başlağan V.İ.Vernadskiy adına Tavriya Milliy Universitetine avuşıp, oquşını devam etmek mümkün. Bunı Qırım.Aqiqat Radiosınıñ saba efirinde TMU rektor vazifesini eda etken Bladimir Kazarin bildirdi.
O qayd etti ki, Qırım ve Aqyardan er angi talebe seçken er angi fakultetke istegen vaqıtta avuşa bile.
«Gençler bellediler, eger qabul etüv komissiyası sentâbr 20 künü öz işini toqtatqan olsa, demek qalğan er şey de toqtatıldı. Biz içtimaiy saifelerden bildirgen edik – avuşacaq talebeler içün öyle degil. Ayrıca diqqat çekem, Qırım ve Aqyardan er angi aliy oquv yurtta, er angi zenaat boyunca tasil alğan studentke biz ya da özümizde yaqın bir bölük teklif etermiz, ya da başqa aliy oquv yurtqa alınması içün yardımcı olurmız. Oqumağa istegenlerge maqsatlarına yetişmeleri içün yardımcı olmağa çare taparmız», – dedi Kazarin.
Vernadskiy adına Tavriya Milliy Universiteti (TMU) 2016 senesinden başlap Ukrainanıñ qitaiy qısımında çalışa. Universitette yedi «Qırım – Ukraina» tasil merkezlerinden biri teşkil etilgen. Qırımdan kelgen abituriyentler, mında kelip, Tışqı mustaqil imtihanlarını tapşırmayıp ukrain tasilini alabileler.
Universitette oquv yılı sentâbr 26 künü Tasil nazirliginiñ binasında keçirilgen tantanalı açılış merasimi ile başlandı.