Oktâbr 24-den itibaren ruzgârdan sebep qapatılğan Keriç parom keçiti avağa köre işine başlay. Bunı «Deñiz müdirligi» şirketiniñ vekili TASS agentligine bildirdi.
«Oktâbr 26-da saat 06:30'da paromlar yüklenmege başladı. Keçit furtuna havfı vaziyetinde avağa köre çalışa», – dep aytıla haberde.
Neşirniñ qayd etkenine köre, yel biraz toqtaldı, böylece paromlarğa seferlerni başlamağa imkân bergen «boşluq» peyda oldı.
Bundan evel Kreml kontrol etken Qırım Fevqulâde vaziyetler hızmeti bildirdi ki, oktâbr 24-26 künleri yarımadada küçlü furtuna yeli esecek. Şu sebepten Keriç parom keçitiniñ işi bozula bile.
Keriç boğazındaki parom keçiti Qırımnı Rusiye Federatsiyasınıñ Krasnodar ülkesi ile birleştirgen esas naqliye bağıdır. Ukraina qanunlarına köre, Keriç keçiti üzerinden Qırımğa kiriş yasaq etile ve devlet sıñırını keçüv qaideleriniñ bozulması sayıla.