Aqmescitte noyabr 1-den başlap kelişmegen yerde qaldırılğan naqliyat tahliye etilecektir. Bunı Kreml kontrol etken Aqmescit memuriyetiniñ yolbaşçısı Gennadiy Baharev bildirdi, dep haber ete Aqmescit memuriyetiniñ matbuat hızmeti.
Baharevniñ aytqanına köre, kelişmegen yerlerde qaldırılğan naqliye vastaları mahsus meydançıqlarğa tahliye etilecektir.
«Para cezasından ğayrı, qaidelerni bozğan kişi duraqta er saat içün para tölemege mecbur olacaq», – dep qoştı Baharev.
Aqmescitniñ Rusiye yolbaşçısı bildirdi ki, bir afta içinde şeer memuriyeti Devlet avtoinspektsiyasınen beraber tahliye ve ceza meydançıqlarınıñ fiyatları aydınlatacaqlar.
Bundan evel Kreml kontrol etken Aqyar fiyatları idaresiniñ yolbaşçısı Dmitriy Şamrey şeer ükümeti maşinalarnıñ ceza meydançıqlarına tahliye etilmesi ve anda bulunması paralı olacağını belgiledi, dep aytqan edi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.