Kyivte oktâbr 25 künü, Ebediy şüret bağçasında Sovetler Birliginiñ eki defa Qaramanı, qırımtatar ve lak tamırlı uçucı Amet-Han Sultannıñ abidesine çeçekler ketirildi. Bunı Qırım.Aqiqat muhbiri bildire.
Abidege gülçemberler qoyuv merasiminde Qırımtatar Milliy Meclis vekilleri, Ukraina devlet ve cemaat erbapları, cemiyet vekilleri iştirak etti.
«Amet-Han Sultan – zamanımıznıñ qaramanıdır. Onı çoq kere öz milletinden vazgeçmege çağıra edilen, lâkin o er zaman ğurur ile qırımtatarı olğanını ayta edi», – dedi faaliyetçi Anife Kurseitova.
«Haytarma» filminde uçucunıñ rolünü icra etken qırımtatar rejissörü ve aktör Ahtem Seitablayev qırımtatarlar yaqın zamanda tuvğan topraqlarına qaytacaqlarına ümüt bildirdi.
«Amet-Han Sultan ömür boyu halqınıñ Ana-Vetanına qaytıp yaşaması için küreşken edi. Ukrainliler ve qırımtatarları kene yarımadağa qaytqanlarını isteyim, çünki Qırım – bu Ukrainadır», – dedi Seitablayev.
В Киеве почтили память крымскотатарского летчика Амет-Хана Султана (фотогалерея)
Umumiy duadan soñ isteyenler abide qarşısına çeçek destelerini qoya bildi.
Amet-Han Sultan 20 oktâbr 1920 künü Alupkada dünyağa keldi. Babası – lak milletinden (Dağıstandaki Tsovkra-1 avulından doğma), anası – qırımtatarı. Ana-babası tarafından Amet-Han Sultannı qırımtatarları da, Dağıstanlılar da öz milliy qaraman olaraq qabul eteler. Amet-Han Sultan 603 cenkâver uçuş yaptı, şahsen özü 30 ve grupp erkanında 19 lüftvaffeniñ uçağını urdı. Uçuş vaqtında uçucı tahminen 100 uçaqnıñ çeşitini ögrendi, uçuşları ise 4237 saatni teşkil ete eken. 1971 senesi fevral 1-de Tu-16 uçma laboratoriyasında deñeme uçuşında elâk oldı. Moskva Novodeviçye mezarlığında defn etildi. Dağıstannıñ paytahtı Mahaçkala şeerinde halqara avalimanına onıñ adı berilgen.