Keçken senege baqqanda soñki 9 ay içinde Qırımdaki doğuv seviyesi 11%-ğa arttı. Bunı Rusiye kontrol etken yarımada adalet nazirliginiñ matbuat hızmeti bildire.
Aqımdaki seneniñ oktâbr 1-ne qadar 17 490 bala doğması qayd etildi. Keçken seneniñ aynı mevsimi ile qıyaslanğanda 2016 senesi doğğan balalarnıñ sayısı 2 biñge qadar arttı – 2015 senesi 9 ay içinde doğğanlarnıñ sayısı 15 723 insannı teşkil etken edi.
Aynı vaqıtta, soñki 5 yıl devamında olğanı kibi, Qırımda oğlanlar daa sıq doğa (8984), dünyağa kelgen qızlarnıñ sayısı 8364 neferni teşkil ete. 207 egiz qayd etildi, üçüz – 3.
Eñ çoq bala Aqmescitte doğa – 6068. Liderler sırasında Yalta – 1118, Kezlev – 1090, Keriç – 1058, Bağçasaray rayonı – 928 ve Kefe – 891. Eñ alçaq doğuv seviyesi Curçı rayonındadır – 214 bala, dep bildire nazirlik.
Mart ortalarında Kreml kontrol etken Qırım sağlıq saqlav nazirligi qırımlılarnıñ ölüm seviyesi artqanını bildirgen edi. Nazirlikniñ malümatına köre, 2015 senesi Qırımda ölüm seviyesi 1000 insanğa 15,3% teşkil etti, 2014 senesi – 14,7%.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.