Salı künü, oktâbr 18-de, FSB hadimleri qırımtatar faali, Kefe regional meclisiniñ azası Suleyman Kadırovnı lingvistik ekspertiza keçirilecegine dair qarar ile tanış ettiler.
Bunı Qırımtatar maaliy merkezi bildire.
Neşirniñ qayd etkenine köre, ekspertiza vaqtında «Kadırov izaat qaldırğan Demyan Demyaçenkonıñ video muracaatınıñ mündericesi ögrenilecektir».
Kadırovnıñ advokatı Andrey Sabinin Facebookta yazğanına köre, o ve daa bir advokat Emil Kürbedinov FSB bölügine bilgisayarlar ile alınmadı, amma tehnikanı kimse tutıp almadı.
«FSB advokatnıñ bilgisayarını tutıp almay, amma yanına almağa da izin bermey. İstegen yerde qaldır. Advokat FSBden malümatnı aydınlatmamaq vesiqası olmasa ketmey», – dep bildirdi Sabinin.
Hatırlatam, oktâbr 5-de Rusiye uquq qoruyıcıları qırımtatar faali Suleyman Kadırovnıñ evine tintüv keçirmege keldi. Tintüv vaqtında bilgisayar ve telefon alındı. Tintüv mahkemeci Rodionov İgor İvanoviçniñ Rusiye Federatsiyası sıñırlarını tanımamaq ve «Asker» qırımtatar batalyonına qoltutmaq çağıruvlarını ögrenme Qararı esasında keçirildi.
Oktâbr 11-de Suleyman Kadırovğa qarşı separatizm içün cinaiy iş açıldı.
İşğalden soñ Qırımda mustaqil mühbirlerde, qırımtatar faallerinde ve Meclis azalarında kütleviy tintüvler sıq-sıq keçirilip başladı. Ukraina Tışqı işler nazirligi (TİN) işğal etilgen Qırımda ukrain vatandaşlarınıñ taqip etilmesinden qasevet çekkenini bildirdi ve basqıncılıqnı toqtatmağa çağırdı. TİN halqara toplulıqqa muracaat etip, Rusiye insan aqları ve ifade serbestligini bozmasın, ukrain siyasiy mabusları ve esirlerini azat etsin dep, oña qarşı bütün uquqiy ve siyasiy basqı usullarını qullansın istedi.